Nam si tantundem est in lanae glomere quantum

corporis in plumbo est, tantundem pendere par est,

corporis officium est quoniam premere omnia deorsum,

contra autem natura manet sine pondere inanis.

Ergo quod magnum est aeque leuiusque uidetur,

nimirum plus esse sibi declarat inanis ;

at contra grauius plus in se corporis esse

dedicat et multo uacui minus intus habere.

Est igitur nimirum id quod ratione sagaci

quaerimus, admixtum rebus, quod inane uocamus.