Version

{ΟΙΔΙΠΟΥΣ}

Ἔπειθες ἢ οὐκ ἔπειθες ὡς χρείη μ´ ἐπὶ

τὸν σεμνόμαντιν ἄνδρα πέμψασθαί τινα ;

{ΚΡΕΩΝ}

Καὶ νῦν ἔθ´ αὑτός εἰμι τῷ βουλεύματι.

{ΟΙΔΙΠΟΥΣ}

Πόσον τιν´ ἤδη δῆθ´ ὁ Λάϊος χρόνον.

{ΚΡΕΩΝ}

Δέδρακε ποῖον ἔργον ; οὐ γὰρ ἐννοῶ.

{ΟΙΔΙΠΟΥΣ}

Ἄφαντος ἔρρει θανασίμῳ χειρώματι ;

{ΚΡΕΩΝ}

Μακροὶ παλαιοί τ´ ἂν μετρηθεῖεν χρόνοι.

{ΟΙΔΙΠΟΥΣ}

Τότ´ οὖν ὁ μάντις οὗτος ἦν ἐν τῇ τέχνῃ ;

{ΚΡΕΩΝ}

Σοφός γ´ ὁμοίως κἀξ ἴσου τιμώμενος.

{ΟΙΔΙΠΟΥΣ}

Ἐμνήσατ´ οὖν ἐμοῦ τι τῷ τότ´ ἐν χρόνῳ ;

{ΚΡΕΩΝ}

Οὔκουν ἐμοῦ γ´ ἑστῶτος οὐδαμοῦ πέλας.

{ΟΙΔΙΠΟΥΣ}

Ἀλλ´ οὐκ ἔρευναν τοῦ θανόντος ἔσχετε ;

{ΚΡΕΩΝ}

Παρέσχομεν, πῶς δ´ οὐχί ; κοὐκ ἐκύρσαμεν.

{ΟΙΔΙΠΟΥΣ}

Πῶς οὖν τόθ´ οὗτος ὁ σοφὸς οὐκ ηὔδα τάδε ;

{ΚΡΕΩΝ}

Οὐκ οἶδ´· ἐφ´ οἷς γὰρ μὴ φρονῶ σιγᾶν φιλῶ.